|
Projecto a Diksionario Amianan, nailungalong |
|
Impaskil ni paraposte
|
|
Sunday, 29 July 2007 |
Nailungalong ti projecto a Diksionario Amianan iti panagtitimpuyog a naaramid iti Mariano Marcos State University (MMSU) iti Ciudad ti Batac itay Julio 26-27 nga inangay ti Nakem Conferences Philippines ken ti MMSU ken dinar-ayan dagiti academicians, scholars, linguists, mamannurat, ken dadduma pay a cultural workers manipud iti Rehion 1, Rehion 2 ken Cordilleras.
Panggep ti projecto, nga igannuat ti Nakem Conferences Philippines, a mangiruar iti uppat a diksionario iti Ilokano a pakairamanan dagiti nadumaduma a pagsasao iti Amianan a Luzon. Umuna ti Amianan English-Ilokano Dictionary, maikadua ti Amianan Ilokano-English Dictionary, maikatlo ti Amianan English-Filipino-Ilokano Dictionary, ken maikapat ti Amianan Dictionary of Ilokano and Northern Philippine Languages. Manamnama a mairuar dagitoy a diksrionario iti 2008 agingga iti 2010.
Ni Dr. Lilia Quindoza Santiago ti Project Coordinator ti Diksionario Amianan ket ni met Dr. Aurelio S. Agcaoili ti General Editor. Mairaman iti agpaay nga ethnoliguistic researchers ken editors dagiti sumaganad (iti alfabetikal a panagsasaganad): Jaime M. Agpalo Jr., Tawid Magazine; Stanley Anongos, Benguet State University; Roy V. Aragon, TMI Global; Ruperta Ramos Asuncion, UP Los Banos; Zacarias Baluscang, ASC; Leticia Benabese, ASIST; Hermilinda Lingbaoan Bulong, UP Press; Elizabeth Calinawagan, UP Baguio; Prescilla Espiritu, UH Manoa; Annabelle Felipe, MMSU; Adelaida Lucero, UP Diliman; Philip Mandac, BSU; Joel B. Manuel, DepEd; Daniel L. Nesperos, GUMIL Filipinas; Bonifacio Ramos, Saint Mary's University; Jaime Raras, University of Northern Philippines; Noemi Rosal, UP Diliman; Antonio Tamayao, Cagayan State University; Elena Toquero, Isabela State University; Perla Ulit, MMSU; Carlo Vadil, Nueva Vizcaya State University; ken Alegria Tan Visaya, MMSU.
|